Gylfi sneri aftur á völlinn á dögunum með Lyngby í fyrsta sinn síðan í maí 2021. Nú er hann mættur í landsliðið í fyrsta sinn síðan 2020.
„Gylfi sagði mér að hann hafi beðið eftir því í tvö ár að spila fyrir Ísland. Það er nóg fyrir mig að heyra það. Hann myndi gefa vinstri eða hægri fót sinn til að spila fyrir Ísland,“ sagði Hareide á blaðamannafundi í dag.
„Ég hef talað við hann mikið. Ég talaði við hann á Íslandi í sumar og hann talaði um metnað sinn til að snúa aftur. Gylfi er einn besti íslenski leikmaður sögunnar. Hann hefur því miður verið frá vellinum í tvö ár.“
Gylfi hefur ekki verið með Lyngby undanarið vegna meiðsla en Hareide segir þau smávægileg.
„Það kom smá bakslag eftir endurkomu sem tengdist bakinu á honum en honum líður strax mun betur.“
Hareide segir að Gylfi geti gefið öðrum leikmönnum íslenska liðsins mikið utan vallar einnig.
„Það verður mikilvægt fyrir okkur að hafa hann í kringum liðið. Mig langar að hafa hann með í okkar áætlunum, hvernig við viljum spila og standa okkur. Hann er mikill fótboltaheili og gæti haft mikil áhrif á aðra leikmenn, jafnvel þó hann byrji ekki leikina. Það mun lyfta öllum upp.
Hann er góð manneskja og mér líkar mjög vel við hann. Hann er vel metinn á meðal íslenskra leikmanna og það er út af persónuleika hans.“
Gylfi var sem fyrr segir frá vellinum í langan tíma og þótti Hareide það leitt.
„Hann á skilið að vera kominn aftur og vera hluti af íslenska landsliðinu því hann vill það svo mikið sjálfur. Saga hans brýtur næstum í manni hjartað því ást hans á fótbolta og þjóð sinni er svo mikil.“
