Blikar taka á móti Zorya eftir að hafa tapað fyrsta leik riðlakeppninnar gegn Maccabi Tel Aviv ytra, 3-2.
„Þeir eru gríðarlega duglegir. Þetta er ungt og orkumikið lið. Þeir eru sterkir í skyndisóknum og með öflugan framherja frá Panama, Guerrero. Þeir hafa farið í riðlakeppnina nokkrum sinnum,“ sagði Óskar um andstæðing morgundagsins á blaðamannafundi í Laugardal, en þar fer leikurinn á morgun fram.
„Þeim hefur ekki gengið vel í deildinni heima. Þeim hefur kannski ekki tekist að halda vel á spilunum á tveimur stöðum frekar en sumir aðrir. Við eigum bara von á gríðarlega erfiðum leik.“
Óskar segir að Blikar stefni á sigur í leiknum og að það sé vel raunhæft. Það megi þó ekki láta blekkjast af slæmum árangri Zorya heima fyrir.
„Ég met okkar möguleika bara fína. Zorya er gott lið og menn skulu ekki láta plata sig á því að þeir hafi átt í smá vandræðum í deildinni. Úkraínska deildin er öflug og jöfn. Auðvitað lítur það þannig út á pappír að Zorya sé næst okkur í styrkleika, að Maccabi og Gent séu tvö sterkustu liðin.
Við mætum í þennan leik með tvö markmið, að sýna góða frammistöðu og að henni fylgi úrslit. Við ætlum okkur að vinna þennan leik og teljum okkur eiga raunhæfa möguleika á því. En það þarf allt að smella. Þú mátt eiginlega ekki gera mistök og þarft að refsa fyrir þau mistök sem andstæðingarnir gera. Ef þú gerir það ekki eru eiginlega engar líkur á að þú fáir eitthvað út úr leiknum.“
