Gylfi Þór Sigurðsson heldur áfram að æfa með Val en möguleiki er á að hann semji við félagið. Gylfi hefur átt í viðræðum við DC United í Bandaríkjunum en óvíst er hvort hann fari þangað.

Gylfi hefur ekki spilað fótbolta í tvö ár en hefur vakið athygli á æfingum Vals en hann verður 34 ára gamall síðar á þessu ári.

Hjörvar Hafliðason stjórnandi Dr. Football ræddi málið í dag. „Ég hef heyrt að mekinn í Gylfa dealnum við Val sé, að hann hafi ekki neinn sérstakan áhuga á peningum frá þeim. Fær eitthvað fyrir leik og peningarnir fari í góðgerðarmál,“ sagði Hjörvar en tók það fram að þetta væri ekki staðfest.

Hrafnkell Freyr Ágústsson sérfræðingur þáttarins tók undir þetta. „Ég er búinn að heyra þetta líka, hann vilji aukalega sjúkraþjálfun og utanumhald,“ segir Hrafnkell.

Hjörvar segir að Gylfi sé að komast í takt en að hann hafi ekki hlustað á öll ráð. „Sagan segir að sjúkraþjálfari hafi ráðlagt honum að taka hálftíma æfingu til að byrja með, hann tók heila 80 mínútna og var að drepast í skrokknum eftir það.“

Hjörvar telur að það hjálpi Val að hafa Arnar Grétarsson sem þjálfara. „Addi Grétars er algjör atvinnumaður, hann kann þetta. Akureyringar eru núna að átta sig á því að það var proffi á æfingasvæðinu. Það gæti hjálpað.“