Ein ótrúlegustu félagaskipti gerðust árið 2006 er fyrrum knattspyrnumaðurinn Marus Cioara vildi skipta um lið.

Cioara er frá Rúmeníu en félag í annarri deild þar í landi, Regal Hornia, vildi kaupa hann frá UT Arad sem spilaði í fjórðu deildinni.

Varnarmaðurinn var búinn að samþykkja skiptin en fékk svo mikið skítkast eftir hvernig Regal Hornia ákvað að borga fyrir hann.

Venjulega er borgað fyrir leikmenn með peningum en í þetta skipti þá var borgað með pylsum, já pylsum.

Regal Hornia bauð UT Arad 15 kíló af pylsum fyrir leikmanninn og var það tilboð samþykkt. Það var eitthvað sem Cioara komst aldrei yfir og lagði skóna á hilluna degi seinna.

Hann fékk gríðarlegt skítkast og varð aðhlátursefni í Rúmeníu eftir skiptin og ákvað að lokum að flýja land og flytja til Spánar.

,,Ég var alltof mikið aðhlátursefni eftir pylsurnar, þetta var gríðarlega niðurlægjandi,“ segir Cioara.

,,Ég ákvað síðar að fara til Spánar þar sem ég byrjaði að vinna þar í sveit. Þeir voru að grínast en þetta var svo alltof mikið.“