Kylian Mbappe sat fyrir svörum á blaðamannafundi franska landsliðsins í dag. Hann var eðilega spurður mikið út í sína stöðu hjá Paris Saint-Germain.

Franska liðið undirbýr sig fyrir leik í Gíbraltar á morgun.

Mbappe hefur verið mikið í umræðunni eftir að hann tilkynnti PSG að hann hyggðist ekki framlengja samning sinn sem rennur út eftir ár. Kappinn vill sitja út samninginn en Parísarliðið vill heldur selja.

„Sem stendur er bara eitt sem kemur til greina og það er að vera áfram hjá PSG. Ég stefni á að vera þar þegar næsta tímabil hefst,“ sagði Mbappe meðal annars á fundinum.

Hann var spurður út í það af hverju hann stæði svo fastur á því að ætla að vera áfram hjá PSG án þess að skrifa undir nýjan samning.

„Það er ekkert til að útskýra. Fólk getur talað og gagnrýnt mig. Ég veit af hverju ég geri það sem ég geri. Fólk hefur ekki allar upplýsingarnar.“

Æðstu menn PSG eru steinhissa á formlegu bréfi Mbappe á dögunum þar sem hann sagði frá því að hann myndi ekki nýta ákvæði í samningi sínum um að framlengja hann um eitt ár.

„Ef ég á að vera hreinskilinn vissi ég ekki að þetta myndi móðga neinn. Ég sendi bara bréf og vissi ekki að bréf gæti drepið einhvern. Mér er sama um viðbrögðin.“