Paul Parker, goðsögn Manchester United, hefur skotið föstum skotum á Portúgalann Bruno Fernandes sem leikur með félaginu í dag.

Parker er á því máli að Fernandes sé alls ekki hæfur í að bera fyrirliðaband Man Utd eins og gegn Leeds í vikunni.

Þessi 28 ára gamli leikmaður er þekktur fyrir að vera góður framar á vellinum og er duglegur að leggja upp sem og skora mörk.

Parker telur þó að Fernandes sé ekki fyrirliðaefni og vorkenndi samherja hans í 2-2 jafnteflinu við Leeds.

,,Ég vorkenndi Marcel Sabitzer, hann þurfti að spila með Bruno Fernandes sem er brjálæðingur og er eins og hauslaus hæna á 200 kílómetra hraða,“ sagði Parker.

,,Bruno Fernandes er með fyrirliðabandið en hann hagar sér ekki eins og leiðtogi. Hann ætti að vera fyrirmynd en ekki verða reiður þegar hlutirnir ganga ekki upp.“

,,Hann er mjög eigingjörn manneskja og á vellinum er hann villtur, hann er svo villtur. Hann þarf að haga sér eins og fyrirliði. Ég býst ekki við að hann bæti sig.“