Helgi Sigurðsson, þjálfari Grindavíkur, er ekki hrifinn af nýju fyrirkomulagi sem verður í Lengjudeild karla á næstu leiktíð.
Þetta var á meðal þess sem var til umræðu þegar Helgi mætti sem gestur í sjónvarpsþáttinn 433.is á Hringbraut í gær.
Með nýju fyrirkomulagi fer aðeins efsta lið Lengjudeildarinnar beint upp í efstu deild. Liðin í 2. – 5. sæti munu svo leika um hitt sætið í deild þeirra bestu.
„Fyrirfram líst mér ekkert ofboðslega vel á þetta. Ég skil samt hugsunina, að fá spennu í þetta og alvöru úrslitaleik í lok móts um að komast upp,“ segir Helgi.
„Yfirleitt er stór munur á liði númer tvö og fimm, jafnvel fimmtán stig að lágmarki. Það getur verið svolítið ósanngjarnt að lið númer tvö spili við lið fimm, fái eitt rautt spjald og það eyðileggi allt sumarið.“
Fyrirkomulagið getur þó komið sér vel.
„Það sem gerist er að þú átt meiri líflínu ef þú byrjar tímabilið illa, sem getur kannski komið okkur að góðum notum í lok sumars. En réttlætið finnst mér ekki mikið í þessu.
Nú er búið að sitja þetta á og það þýðir ekkert að væla yfir því. Við þurfum að koma okkur upp og það eru tvær leiðir til þess. Það er annars vegar að vera í fyrsta sæti eða vinna þessa úrslitakeppni.“
