Eins og fram kom síðla hausts eru eigendur tveggja stærstu félaga Englands, Manchester United og Liverpool, opnir fyrir því að selja þau. Það virðist þó sem meiri áhugi sé á að kaupa fyrrnefnda félagið.

Glazer-fjölskyldan hefur átt United síðan 2005 en Fenway Sports Group Liverpool síðan 2010.

Jóhann Már Helgason, sparkspekingur og viðskiptafræðingur, mætti í sjónvarpsþátt 433.is á dögunum og ræddi meðal annars hugsanlegar sölur á stórliðunum tveimur.

Það er útlit fyrir það sem stendur að meiri áhugi sé á United. „Maður veit ekki hvað gengur á á bak við tjöldin en miðað við það sem maður les er það þannig,“ segir Jóhann.

„Jim Ratcliffe virðist ætla að reyna að kaupa United og á sama tíma er maður farinn að horfa á að Liverpool sé jafnvel farið að sætta sig við að taka inn hluthafa, selja ekki meirihlutann frá sér.“

Málin gætu þó farið að skýrast á næstu misserum.

„Í byrjun febrúar eiga þeir að fara að opna tilboðin. Þá sjáum við hverjir sitja eftir, þeir sem vilja kaupa Manchester United, hafa þeir mögulega áhuga á að kaupa Liverpool? Það virðist vera þannig.“

En af hverju er staðan svona? „United er búið að vera í lægð í langan tíma og það eru meiri vaxtarmöguleikar þar. Liverpool er búið að taka völlinn sinn í gegn, ég held að Manchester United geti gert betur á Old Trafford. Sem einhver sem kemur inn í þetta horfir þú á það svo að þú getir vaxið meira hjá Manchester United.“

Hér að neðan má sjá þátt 433.is og enn neðar má nálgast hann í hlaðvarpsformi