Fyrsta degi réttarhalda yfir knattspyrnugoðsögninni Ryan Giggs er nú lokið.

Þessi fyrrum leikmaður Manchester United er sakaður um að ofbeldi gegn fyrrverandi kærustu sinni og að hafa ráðist á systur hennar. Líkamlega ofbeldið sem um ræðir er sagt hafa átt sér stað árið 2020. Þá er Giggs sakaður um að beita Kate Greville, fyrrverandi kærustu sína, andlegu ofbeldi á árunum 2017-2020.

Réttarhöldin fóru af stað í dag. Munu þau standa yfir næstu tíu daga. Þau fara fram í Manchester. Verði Giggs dæmdur sekur gæti hann átt yfir höfði sér allt að fimm ára fangelsisdóm.

Giggs búi yfir vondri hlið
Peter Wright, saksóknari, segir Giggs búa yfir „vondri hlið.“ Hann segir að Giggs hafi verið frábær knattspyrnumaður en að utan vallar sé sagan önnur. Wright segir að Giggs hafi beitt bæði andlegu og líkamlegu ofbeldi og að hann hafi nýtt sér veikleika Greville til að upphefja sjálfan sig. „Þetta er saga stjórnunnar og andlegs ofbeldis ofbeldis á konu sem hélt hún væri elskuð og virt. Því miður var veruleikinn annar,“ segir Wright.

Hann segir réttinum jafnframt að Giggs hafi orðið verri og stjórnsamari með tímanum og að hann hafi fengið Greville til að efast um eigin upplifanir.

Giggs er meðal annars sóttur til saka vegna líkamlegs ofbeldis þann 1. nóvember 2020. Þá hafði Greville sagt systur sinni að hún ætlaði sér að fara frá Giggs áður en hann kæmi heim. Hann kom hins vegar heim fyrr en áætlað var. Þá fóru þau að rífast. „Það færðist harka í leikinn. Hann reyndi að taka símann hennar af henni,“ segir Wright.

Viðurkennir að hafa meitt hana óvart 
Einnig segir Wright að Giggs hafi veitt Greville olnbogaskot og skallað hana. Eitt kvöldið henti hann henni svo nakinni út af hótelherbergi þeirra eftir að þau höfðu rifist, þar sem hún taldi hann reyna við aðrar konur.

Sem fyrr segir er meint ofbeldi Giggs einnig af andlegum toga. Wright segir frá því að fyrrum leikmaðurinn hafi hótað því að dreifa „persónulegum myndum“ af Greville. Þá á hann að hafa mætt óumbeðinn heim til hennar, þar sem hún stundaði líkamsrækt og á fleiri staði.

Sjálfur viðurkennir Giggs að hafa smávægilega eða óvart meitt Greville líkamlega en að það hafi ekki verið nálægt því að vera af glæpsamlegum toga. Verjandi Giggs segir hann vera fórnarlambið og að ásakanir á hendur honum séu byggðar á andlegu ofbeldi ýkjum og lygum.