Cristiano Ronaldo hefur verið orðaður burt frá Manchester United í allt sumar.
Portúgalinn vill spila í Meistaradeild Evrópu, eitthvað sem United getur ekki boðið honum eftir vonbrigði á síðustu leiktíð.
Ronaldo hefur verið orðaður við fjölda stórliða um allan heim en ekkert þeirra virðist til í að taka sénsinn á honum.
Fyrr í sumar sagði Erik ten Hag, nýr stjóri United, að Ronaldo væri í áætlunum sínum fyrir komandi leiktíð. Nú telur Martyn Ziegler, blaðamaður The Times, að Hollendingurinn hafi skipt um skoðun.
„Ronaldo hefur sagt það nokkuð skýrt að hann vilji fara. Ten Hag sagði upphaflega að hann vildi hafa hann áfram. Ég skil það, hann skoraði 18 mörk á síðustu leiktíð og var með markahæstu mönnum úrvalsdeildarinnar. Það er enginn annar þarna sem skorar svona,“ segir Ziegler.
„En ef þetta er að skemma fyrir félaginu þá er kannski betra að hann fari. Ten Hag tekur ef til vill ákvörðun á þann veg fljótlega.“
„Það eru fréttir um að styrktaraðilar félagsins hafi hjálpað til við að festa kaup á honum í fyrra. Eigendur og stjórnarmenn munu gera það sem er best fyrir félagið. Ef þeir telja að það sé best að hann fari, munu þeir losa sig við hann.“
United hefur byrjað tímabilið afleitlega. Liðið tapaði 1-2 gegn Brighton í fyrstu umferð og um helgina tapaði það 4-0 gegn Brentford.
