Óskar Hrafn Þorvaldsson er orðaður við stjórastarfið hjá Norrköping í Svíþjóð og ku vera einn af þremur á lista.
Óskar hefur gert mjög góða hluti með Blikum og var fyrir það hjá Gróttu þar sem árangurinn var frábær.
Eftir leik Breiðabliks í Sambandsdeildinni í gær ræddi Óskar við Fótbolta.net og var spurður út í orðróminn.
Rikard Norling hefur verið rekinn úr starfi hjá Norrköping en Óskar hefur áður verið orðaður við starfið hjá AGF í Danmörku en var ekki ráðinn þangað.
„Ég get ekkert verið að tjá mig um orðróm. Það er ekki mitt og er með 100 prósent fókus á verkefnið með Breiðabliki,„ sagði Óskar við Fótbolta.net.
Breiðablik er komið í næstu umferð Sambandsdeildarinnar eftir sigur á Santa Coloma.