Arnar Þór Viðarsson, þjálfari karlalandsliðs Íslands, mun frá og með haustinu ekki lengur gegn starfi yfirmanns knattspyrnumála hjá Knattspyrnusambandi Íslands með landsliðsþjálfarastarfinu.

Vanda Sigurgeirsdóttir, formaður KSÍ, staðfestir þetta í samtali við Vísi.

Vanda segir að staðan verði auglýst í haust. Ákveðið var árið 2020 að Arnar myndi gegna stöðu yfirmanns knattspyrnumála tímabundið. Það reyndust þó verða tvö ár þegar uppi var staðið. Nú mun hann geta einbeitt sér að þjálfarastarfinu eingöngu.

„Fyrri stjórn ákvað í desember að þetta væri eitthvað sem við þyrftum að gera, enda finnst mér það mjög eðlilegt. Það er fullt starf að vera þjálfari A-landsliðs karla,“ sagði Vanda við Vísi.

Næsti leikur karlalandsliðsins verður gegn Albaníu ytra í lok september. Leikurinn er liður í Þjóðadeildinni, þar sem Ísland á enn möguleika á að enda efst í sínum riðli.