Rætt var um yfirvofandi sölu Roman Abramovich í þættinum Íþróttavikan með Benna Bó, sem sýndur var á Hringbraut. Magnús Geir Eyjólfsson, fréttamaður á RÚV og grjótharður stuðningsmaður Everton, mætti í settið ásamt Herði Snævari, íþróttatjóra Torgs.

Magnús benti á að Roman hafi ekki átt neinn annan möguleika í stöðunni. „Ólígarkarnir sjá fram á að Evrópuþjóðirnar eru að fara gera eignir upptækar. Þjóðverjar og Frakkar eru farnir að gera snekkjur upptækar og spurning hvenær bretar fara af stað. Hann hefur séð sæng sína útbreidda og þurfti að losa sig við Chelsea,“ sagði Magnús.

Hörður segir að Abramovich hafi gert Chelsea að sigursælasta liði Englands á þessari öld. Hann sé búinn að vinna 21 titil á þeim 19 árum sem hann sé búinn að eiga liðið. „Hann er með hag klúbbsins í brjósti og ákveður að losa sig við félagið en það eru ekki hver sem er sem getur reitt fram þrjá milljarða punda upp úr götunni þannig það getur verið flókið að selja félagið,“ sagði Hörður.

Þeir félagar bentu á að Abramovic hefðu breytt Chelsea, enskri knattspyrnu og jafnvel evrópskri knattspyrnu enda hefur markaðurinn gjörbreyst eftir að hann steig inn í félagið sem hann keypti á aðeins yfir 100 milljónir punda.

„Það er ekkert auðvelt að finna kaupanda að svona liði. Spurning hvort Sádarnir sem keyptu Newcastle séu að sjá eftir sínum kaupum,“ sagði Magnús og Hörður tók boltann á lofti. „Þeir eru að lemja hausnum við stein akkúrat núna. Þetta er klink í þeirra augum og hefðu þá fengið besta félag Englands síðustu 20 árin.“