Óskar Hrafn Þorvaldsson var gestur í vikulegum þætti Gísla Marteins sem var sýndur á Rúv nú fyrir helgi.

Óskar er knattspyrnuaðdáendum kunnur en hann hefur náð frábærum árangri sem þjálfari Breiðabliks sem vann Íslandsmeistaratitilinn fyrr á þessu ári.

Gísli Marteinn kom með góða spurningu til Óskars um hans vinnubrögð og hvort hann myndi ekki nota sömu gildi í öðru starfi og sem knattspyrnuþjálfari.

Óskar er með afar einstaka hugmyndafræði og hefur þess vegna náð frábærum árangri bæði sem þjálfari Breiðabliks og Gróttu.

,,Ég stýrði einhvern tímann fréttastofu og prentmiðli og það eru sömu áherslur sem þú þurfir að hafa. Þú þarft að búa til umhverfi þar sem fólki líður vel og búa til umhverfi þar sem þú leyfir fólki að þróast og gera mistök og hvetur fólk til að fara úr þægindarrammanum,“ sagði Óskar.

,,Hluti af þessu fyrir mig, að vera í þessum þætti hérna er að mér finnst ekki þægilegt að vera í sjónvarpi en ég þarf að ganga fram með góðu fordæmi við hópinn minn og leikmennina mína og ekki biðja bara þá um að vera vulnerable í hinum ýmsu óþægilegu stöðum heldur þarf ég líka að takast á við það.“

,,Maður þarf að reyna að búa til umhverfi þar sem fólki líður vel. Þetta snýst um að líða vel.“

Leikkonan Vala Kristín Eiríksdóttir var mjög hrifin af þessum ummælum Óskars og kom með skemmtilega spurningu í kjölfarið.

,,Viltu stjórna lífinu mínu? Ertu til í að ef ég hringi í þig á morgun, að ráða hvernig ég spila út úr restinni?“

Óskar svaraði þá á sannfærandi hátt: ‘Ekkert mál, já ekkert mál.’