Ásgerður Stefanía Baldursdóttir fyrrum leikmaður Vals og nú þjálfari hjá félaginu var gestur í Íþróttavikunni með Benna Bó á föstudagskvöld en með henni í setti var Hörður Snævar Jónsson, fréttastjóri íþrótta á Torgi.
Jón Daði Böðvarsson var ein af hetjum vikunnar en hann skoraði sigurmark fyrir Bolton í uppbótartíma.
„Ég held svo mikið með honum,“ sagði Benedikt Bóas um Jón Daða sem hefur átt nokkuð erfiða tíma innan vallar á Englandi um nokkur skeið.
Ásgerður Stefanía segir að íslenska landsliðið þurfti á Jóni Daða að halda á næstunni. „Það er svo auðvelt að halda með honum, hann virðist vera að gera góða hluti. Við gætum þurftum að nýta hann í íslenska landsliðshópnum næstu árin,“ sagði Adda.
Hörður Snævar benti á það að næsta ár sé stórt fyrir landsliðið þar sem undankeppni EM 2024 fer öll fram. „Við þurfum allar hendur á dekk,“ sagði Hörður.
Umræðan er hér að neðan.
