Rio Ferdinand, fyrrum liðsfélagi Wayne Rooneys hjá Manchester United og enska landsliðinu, segir það ekkert gefið að Wayne Rooney muni taka við Everton ef honum býðst starfið. Hann sé á góðri vegferð með Derby þrátt fyrir afleita stöðu félagsins utan vallar.

Rooney er talinn vera einn af þeim sem koma til greina í starf knattspyrnustjóra Everton en Spánverjinn Rafa Benítez var á dögunum rekinn úr starfi.

,Ég tel að Rooney muni vera alveg jafn ánægður með að vera áfram hjá Derby eins og hann myndi vera ef hann tæki við Everton. Hjá Derby getur hann unnið magnað afrek með því að halda liðinu uppi á mjög erfiðum tímum. Hjá Everton væri hann að taka við stjórnartaumunum hjá uppeldisfélagi sínu,“ sagði Rio Ferdinand, fyrrum liðsfélagi Rooneys hjá Manchester United í þætti sínum Vibe with Five.

,,Ef hann fer til Everton, þá getur komið upp sá möguleiki að hann horfi til baka og hugsi með sér ‘það hefði verið gaman að klára verkefnið sem ég byrjaði á’ en fótboltinn er mjög ósérhlífinn og hraður leikur. Hvað gerist til dæmis ef dæmið gengur ekki upp hjá Derby og falla?“ bætti Rio við.

Félagsskiptasérfræðingurinn Fabrizio Romano, var einnig gestur í þættinum og hann segir Roberto Martinez, landsliðsþjálfara Belgíu og fyrrum knattspyrnustjóra Everton, hafa verið efstann á blaði. Hann segir hins vegar engar líkur eins og staðan er núna að Martinez taki við stjórnartaumunum á Goodison Park.

,,Everton á nú í viðræðum við Rooney en einnig Frank Lampard, þetta eru ekki auðveldar kringumstæður fyrir félagið og þá einna helst í ljósi þeirrar staðreyndar að félagið seldi einn besta leikmann sinn, Lucas Digne, fyrr í félagsskiptaglugganum vegna þess að Rafa vildi losna við hann, þeir fengu inn annan leikmann vegna þess að Rafa vildi hann en nú er Rafa farinn,“ sagði Fabrizio Romano í þættinum Vibe with Five.