Í dag og í kvöld var leikið í lokaumferð riðla E og F í Afríkukeppninni. Þar með er riðlakeppni mótsins lokið.

Meistarnir úr leik – Kwame sá rautt

Alsír er ríkjandi Afríkumeistari. Liðið féll hins vegar úr leik í dag eftir 3-1 tap gegn Fílabeinsströndinni.

Franck Kessie og Ibrahim Sangare sáu til þess að Fílabeinsströndin leiddi 2-0 í hálfleik. Nikolas Pepe kom þeim svo í 3-0 á 54. mínútu. Sofiane Bendebka minnkaði muninn fyrir Alsír þegar rúmur stundarfjórðungur lifði leiks.

Á sama tíma vann Miðbaugs-Gínea 1-0 sigur á Sierra Leone.

Pablo Ganet skoraði eina mark leiksins á 38. mínútu. Kwame Quee, sem lék með Víkingi Reykjavík í sumar, fékk sitt annað gula spjald og þar með rautt í lok leiks.

Fílabeinsströndin vinnur riðilinn með 7 stig. Miðbaugs-Gínea fylgir þeim í 16-liða úrslit með 6 stig.

Þrjú lið áfram úr F-riðli

Í F-riðli vann Malí 2-0 sigur á Márataníu. Massadio Haidara og Ibrahima Kone gerðu mörk liðsins í sitthvorum hálfleiknum.

Á sama tíma vann Gambía dramatískan 1-0 sigur á Túnis. Ablie Jallow skoraði sigurmarkið í uppbótartíma.

Malí og Gambía fara áfram sem tvö efstu lið þessa riðils með 7 stig. Túnis fylgir þeim í 16-liða úrslit þar sem liðið er þriðja stiga hæsta lið keppninnar sem hafnar í þriðja sæti.