Róbert Orri Þorkelsson, leikmaður Montreal og íslenska U-21 árs landsliðsins, býst við jöfnum umspilsleik gegn Tékkum á föstudag. Liðið sem sigrar í tveggja leikja einvígi fer í lokakeppni EM á næsta ári. Fyrri leikurinn fer fram hér heima á föstudag en seinni leikurinn ytra fjórum dögum síðar.

„Þetta verður 50/50 leikur. Við erum búnir að gera hrikalega vel hingað til og ætlum að halda því áfram og komast í lokakeppnina,“ segir Róbert við 433.is í aðdraganda leiksins.

Róbert er leikmaður Montreal í MLS-deildinni vestanhafs. Hann kom þangað frá Breiðabliki í fyrra en hefur ekki verið í stóru hlutverki.

„Maður fær kannski ekki að spila eins og maður hefði viljað en á næsta tímabili fæ ég vonandi fleiri mínútur.“

Hann segir gæðin í MLS-deildinni mikil.

„Ég get bara borið það saman við íslenskt stig en það er mjög gott. Maður sér marga marga stóra leikmenn frá topp fimm deildunum fara í MLS-deildina fyrir þrítugt. Það sýnir að gæðin eru mikil. Svo eru fínar tekjur þarna líka.“

Róbert er með samning í Kanada út næsta ár og stefnir á að vera hjá Montreal út næstu leiktíð hið minnsta.

„Eins og er er ég með einbeitinguna þar. Ég stefni á að vera áfram á næsta tímabili og halda áfram að gera vel.“