Cristiano Ronaldo vill ólmur ganga í raðir Borussia Dortmund frá Manchester United. Þýska blaðið BILD segir frá þessu.

Talið er að hinn 37 ára gamli Ronaldo sjái félagaskipti til Dortmund sem tækifæri til að leika í Meistaradeild Evrópu á næstu leiktíð, eitthvað sem United getur ekki boðið honum eftir að hafa hafnað í sjötta sæti ensku úrvalsdeildarinnar á síðustu leiktíð.

Laun Ronaldo gætu hins vegar reynst vandamál fyrir Dortmund, sem er ekki vant því að greiða leikmönnum himinnhá laun.

Ronaldo hefur reynt að komast í burtu frá United í allt sumar, þar sem hann vill leika í Meistaradeildinni. Hann hefur verið orðaður við hvert stórliðið á fætur öðru. Fáir virðast þó til í að taka sénsinn á honum.

Á dögunum sagði Ronaldo frá því að um mánaðarmót myndu allir fá að heyra sannleikann um sumar hans, sem hann segir uppfullt af lygasögum um sjálfan sig.