Víkingur Reykjavík er úr leik í Meistaradeild Evrópu þetta tímabilið eftir tap gegn Malmö í fyrstu umferð undankeppninnar. Malmö vinnur einvígið samtals 6-5 eftir 3-3 jafntefli í kvöld.

„Við getum verið gríðarlega stoltir og gengið, kannski ekki sáttir frá borði, en við gáfum leik leik og þeir refsuðu okkur. Við þurufm bara að fara yfir þessa leiki og læra af þessu,“ segir Karl Friðleifur Gunnarsson, leikmaður Víkings, eftir leik.

Víkingur var manni færri meirihluta leiksins úti í Malmö og kom sér aftur inn í einvígið eftir að hafa lent 1-3 undir í kvöld. Karl segir mikinn karakter í liðinu. „Við sýndum það líka þegar við lentum undir úti. Það er gríðarlegur karakter í þessu liði og allir tilbúnir til þess að deyja fyrir liðið.“

Það var Kristall Máni Ingason sem fékk rautt spjald í fyrri leiknum. Hugsa leikmenn út í það sem hefði getað orðið með fullmannað lið úti í Malmö? „Það er alltaf ef og hefði. En það hefði verið gaman að spila ellefu á ellefu allan leikinn úti. En við áttum bullandi séns í dag og þurfum að læra af þessu mörkum sem við fáum á okkur,“ segir Karl Friðleifur.

Sjálfur skoraði hann tvö mörk í kvöld. „Það er mjög gaman en gríðarlegt svekkelsi að skora og fara ekki áfram. Það er svolítið að pirra mig.“

Víkingur mætir Linfield frá Norður-Írlandi eða New Saints frá Wales í annari umferð Sambandsdeildarinnar, nú þegar liðið er úr leik í Meistaradeildinni. „Við fínpússum þessa hluti sem við þurfum að laga og þá held ég að við eigum góðan séns,“ segir Karl Friðleifur um það verkefni.