Þrír Íslendingar voru í byrjunarliði Sogndal í kvöld sem spilaði við Mjondalen í næst efstu deild Noregs.

Sogndal vann mikilvægan 1-0 heimasigur og var markið skorað er allir Íslendingarnir voru enn inná vellinum.

Hörður Ingi Gunnarsson, Jónatan Ingi Jónsson og Valdimar Þór Ingimundarson léku fyrir Sogndal í leiknum.

Valdimar spilaði allan leikinn en Hörður var tekinn af velli á 75. mínútu og Jónatan á þeirri 90.

Sveinn Aron Guðjohnsen lagði þá upp mark fyrir Elfsboerg sem vann 4-1 heimasigur á Varberg í Svíþjóð.

Sveinn Aron kom inná sem varamaður á 59. mínútu og lagði upp fjórða mark liðsins í uppbótartíma.

Lærisveinar Milos Milojevic í Malmö unnu einnig sinn leik 2-1 gegn Helsingborg og eru í fimmta sæti deildarinnar.