Rúnar Kristinsson sá sína menn í KR tapa stórt í kvöld er liðið heimsótti topplið Breiðabliks í Kópavoginn.
Blikar hafa verið langbesta lið mótsins hingað til og unnu sannfærandi 4-0 heimasigur á þeim svarthvítu í kvöld.
Rúnar ræddi við Stöð 2 Sport eftir leikinn og segir að hans menn hafi verið betri aðilinn lengi vel í kvöld og að fyrstu tvö mörkin hafi verið gjöf úr Vesturbænum.
,,Það er sárt að tapa fótboltaleikjum og að tapa honum er ekki gott heldur. Ef þú lendir undir gegn Blikum þá er erfitt að snúa því við en við áttum svo sannarlega möguleika í fyrri hálfleik og vorum að mínu mati betri aðilinn í fyrri hálfleik,“ sagði Rúnar.
,,Við gefum fyrsta markið og svo er vítaspyrna sem við gefum líka. Allt virtist vera under control en svo náum við að klúðra því. Fyrstu tvö mörkin sem þeir skora eru gjöf frá okkur.“
,,Við erum í kjörstöðum oft, við eigum fimm, sex eða sjö hornspyrnur í fyrri hálfleik, við eigum skotsénsa inn í teig en menn eru að flýta sér stundum of mikið og það vantar smá gæði í síðustu sendinguna og í skotinu og í þessum færum sem við erum að fá. Við höfum verið þannig undanfarið, við skorum ekkert sérstaklega mikið af mörkum og nýtum ekki færin vel í sumar.“
Rúnar var svo ósammála því að Blikar hafi verið með algjörlega annað orkustig en KR-ingar í seinni hálfleik.
,,Ég er alls ekki sammála því, það er bara vindurinn sem skiptir máli. Það er auðveldara að spila upp völlinn og þeir geta haldið boltanum betur. Það er 2-0 og þeir fá heppnismark, 3-0, skotið í mann og boltinn breytir um stefnu. Það er engin uppjöf hjá okkur, menn eru að reyna, við vorum svolítið út úr stöðu og þetta verður svolítið losaralegt þegar þú ert að tapa 3-0 og ekki von á að breyta þessu.“
