Harry Maguire ætti að gefa frá sér fyrirliðaband Manchester United að sögn fyrrum varnarmanns liðsins, Mikael Silvestre.

Silvestre telur að það muni hjálpa Maguire mikið að einbeita sér fullkomlega að eigin spilamennsku frekar en að bera bandið hjá einu stærsta félagi heims.

Maguire var harðlega gagnrýndur fyrir frammistöðu sína á síðustu leiktíð og þarf svo sannarlega að spila betur er nýtt tímabil hefst.

,,Þetta er erfið staða. Þetta er tvöföld áskorun því til að vera fyrirliði þá þarftu að vera tæknilegur leiðtogi og það þýðir að þú þarft að spila þinn besta leik,“ sagði Silvestre.

,,Leiðtogahæfileikarnir koma á eftir því. Ég held að hann þekki stöðuna og veit nákvæmlega hvar hann er þegar kemur að frammistöðu. Vonandi fær hann gott andlegt frí með nýjum stjóra og nýjum hugmyndum sem hjálpa honum að komast í sitt besta stand.“

,,Við gerum of mikið úr því á Englandi hver er fyrirliði og hver ekki. Ég veit ekki af hverju það er svona mikil einbeiting á það því þú ert með Cristiano Ronaldo, David de Gea og Bruno Fernandes sem eru efni í fyrirliða.“

,,Það skiptir því ekki öllu máli. Ef þú ert með breskan landsliðsmann í hópnum sem getur borið bandið þá er það gott fyrir ímynd félagsins en það er ekki nauðsynlegt. Fyrir Harry er það mikilvægast að komast aftur á byrjunarreit og verða mjög, mjög góður varnarmaður.“