Juan Mata er í raun goðsögn í enska boltanum en hann hefur gert frábæra hluti með bæði Chelsea og Manchester United.
Mata kom fyrst til Englands fyrir 11 árum síðan og var lengi besti leikmaður Chelsea áður en hann hélt til Manchester.
Þessi 34 ára gamli Spánverji er nú án félags en Man Utd ákvað að sleppa því að framlengja hans samning í sumar.
Samkvæmt enskum miðlum er Mata með risatilboð frá Sádí Arabíu um að skrifa undir hjá Al-Hilal þar í landi.
Það er nóg til af peningum hjá Al-Hilal sem hafa boðið Mata 8,5 milljónir punda til að spila fyrir liðið í eitt tímabil.
Það er ansi freistandi tilboð fyrir leikmann á lokametrunum en Odion Ighalo, fyrrum leikmaður Man Utd, er á mála hjá félaginu.
Mata ku vera með þónokkur tilboð á borðinu og mun væntanlega taka ákvörðun um framtíðina á næstu vikum.
