Carlos Tevez hefur ákveðið að leggja skóna á hilluna eftir farsælan knattspyrnuferil.
Argentínumaðurinn er 38 ára gamall. Hann lék með Manchester United á Englandi og vann fjölda titla með félaginu áður en hann flutti sig yfir til nágannanna í Manchester City þar sem hann varð deildar- og bikarmeistari.
Hann lék einnig með West Ham, Juventus, Corinthians, Boca Juniors og kínverska liðinu Shanghai Shenhua og á að baki 76 landsleiki fyrir A-landslið Argentínu. Tevez segist hafa fengið fjölda tilboða frá Bandaríkjunum en ákveðið að binda enda á ferilinn vegna fráfalls föður síns.
„Ég er hættur, það er staðfest. Mér stóð margt til boða, meðal annars í Bandaríkjunum. En það er komið nóg. Ég lagði lagt allt í þetta,“ segir Tevez á vefsíðu Mundoal Biceleste.
„Það var mjög erfitt að spila síðasta árið en mér tókst að hitta föður minn. Ég hætti að spila vegna þess að ég missi minn dyggasta stuðningsmann,“ bætti Tevez við.
