Framherjinn Robert Lewandowski ætlar sér ekki að vera áfram hjá Bayern Munchen á næstu leiktíð. Þetta staðfestir Hasan Salihamidzic, yfirmaður knattspyrnumála hjá félaginu.
„Ég ræddi við Lewa og hann sagði mér að hann vill ekki framlengja samning sinn við okkur og vill yfirgefa félagið,“ sagði Salihamidzic í samtali við Sky í Þýskalandi.
„Hann segist vilja prófa eitthvað nýtt en við höfum ekki breytt afstöðu okkar. Lewa er samningsbundinn til 30. júní 2023. Það er staðreynd,“ bætti hann við.
Pólverjinn tjáði sig sjálfur um málið eftir 2-2 jafntefli Bayern gegn Wolfsburg í dag. „Ég get staðfest að ég ræddi við Hasan og sagði honum frá ákvörðun minni. Ég mun ekki skrifa undir nýjan samning við Bayern,“ sagði Lewandowski.
„Báðir aðilar þurfa að huga að framtíðinni. Við verðum að finna bestu lausnina fyrir báða aðila,“ bætti hann við.
