Rætt var um stöðuna sem landsliðsmaðurinn í knattspyrnu Jón Dagur Þorsteinsson er kominn í hjá AGF í Danmörku. Jón Dagur hefur verið settur í frystikistuna hjá félaginu eftir að hafa neita að skrifa undir nýjan samning og sérfræðingar Íþróttavikunnar með Benna Bó, þeir Hörður Snævar Jónsson, íþróttastjóri Torgs og Albert Brynjar Ingason, væru til í að sjá hann reyna fyrir sér á Englandi.

,,Ég held að honum dreymi um England en þetta er ekki góð staða, að vera settur út í kuldann þegar að það er þetta mikið eftir á mótinu. Sérstaklega fyrir hann og landsliðið þar sem að hann mun væntalega ekki spila fótboltaleik frá mars og fram í júní þegar að landsliðið hefur leik í Þjóðadeildinni,“ sagði Hörður.

,,Enska 1. deildin yrði skemmtileg áskorun fyrir gæja með svona attitude. Það væri reyndar fyndið ef hann myndi síðan bara fara yfir í eitthvað annað danskt lið,“ bætti Albert Brynjar þá við en á tímapunkti var talið að Jón Dagur hefði rætt við önnur dönsk lið og að það hefði sett stöðu hans hjá AGF í uppnám.

,,Hann segir að fyrsti kostur sé að horfa út fyrir Danmörku en samkvæmt fjölmiðlum þar hafa að minnsta kosti tvö lið spurst fyrir um hann. Það væri stórt skref fyrir hann að fara í ensku 1. deildina úr því að vera klukkutíma maður í AGF því hann er alltaf tekinn af velli þar eftir 60 mínútur,“ sagði Hörður Snævar í Íþróttavikunni með Benna Bó.

Nánari umfjöllun um stöðu Jóns Dags Þorsteinssonar má sjá hér fyrir neðan.