Ítalski knattspyrnustjórinn Claudio Ranieri hefur verið rekinn frá Watford eftir slæmt gengi liðsins að undanförnu. BBC segir frá.
Ranieri var ráðinn knattspyrnustjóri Watford þann 4. október 2021 og var aðeins við stjórnvölinn í 14 leikjum liðsins. Síðasti leikur Watford var 3-0 tap gegn Norwich á heimavelli og féll liðið í fallsæti með tapinu.
Watford leitar nú að fimmtánda knattspyrnustjóra félagsins síðan að Pozzo fjölskyldan tók yfir árið 2012.
Ranieri, sem vann ensku úrvalsdeildina með Leicester tímabilið 2015-16, skrifaði undir tveggja ára samning við Watford eftir að Xisco Munoz var látinn taka poka sinn.
Watford vann hins vegar aðeins tvo leiki undir stjórn hans og situr liðið í 19. sæti deildarinnar, tveimur stigum frá öruggu sæti.
Næst leikur liðsins er á útivelli gegn Burnley þann 5. febrúar næstkomandi.
