Knattpsyrnumboðsmaðurinn Mino Raiola er mögulega sá stærsti í bransanum. Möguleiki er á því að hann verði viðloðinn þrjú af stærstu félagaskiptin í knattpyrnuheiminum næsta sumar.
Raiola er með menn á borð við Paul Pogba, Erling Braut Haaland og Zlatan Ibrahimovic á sínum snærum.
Talið er næsta víst að Raiola muni koma Haaland frá Dortmund í nýtt félag næsta sumar. Þá verður norski framherjinn fáanlegur fyrir 68 milljónir punda, vegna klásúlu sem Raiola lét setja í samning leikmannsins þegar hann kom til Dortmund frá RB Salzburg í janúar árið 2020.
Matthijs de Ligt, miðvörður Juventus, er einnig á mála hjá Raiola. Talið er að þessi 22 ára gamli leikmaður gæti farið frá félaginu næsta sumar. Klásúlan í hans samningi er þó töluvert hærri en hjá Haaland, 128 milljónir punda.
Loks gæti Pogba farið frá Manchester United. Samningur miðjumannsins rennur út næsta sumar. Raiola hefur verið duglegur við það að rugla stuðningsmenn Man Utd í rýminu um það hvort Pogba verði áfram eða ekki. Ljóst er að Frakkinn gæti farið frítt frá félaginu næsta sumar.
Auk þessara leikmanna sem taldir eru upp hér að ofan eru stjörnur á borð við Gianluigi Donnarumma, Mario Balotelli, Moise Kean og Marco Verratti á mála hjá Raiola, svo eitthvað sé nefnt.
