Það kemur Troy Deeney ekki á óvart að liðsfélagar Cristiano Ronaldo hafi forðast að borða sætindi eftir komu hans til Manchester United.

Lee Grant, markvörður United, greindi frá því á dögunum að enginn leikmaður liðsins hafi þorað að fá sér eftirrétt er liðið borðaði saman þar sem Ronaldo var bara í hollustunni.

Ronaldo er þekktur fyrir að hugsa ansi vel um sig og líkama sinn til að halda sér á toppnum og borðar aðeins hollustu. Leikmenn Manchester United líta greinilega upp til hans þar sem þeir eru vanir að fá sér óhollustu eftir leik en gerðu það ekki fyrir framan stórstjörnuna. Troy Deeney er sammála þessu og segir að hann myndi borða nánast hvað sem er ef Ronaldo væri að því.

„Ef Ronaldo myndi borða hestaskít fyrir leik þá myndi ég gera það sama,“ sagði Troy Deeney.