Það kom fram á The Athletic í morgun að Arsenal hefði áhuga á Lautaro Martinez, framherja Inter. Nú gæti svo farið að Tottenham reyni einnig að næla í leikmanninn.

Talið er að Arsenal hafi þegar sett sig í samband við Inter til að ræða hugsanleg skipti Martinez í ensku úrvalsdeildina. Arsenal þarf þó að selja leikmenn fyrst. Horft er til Alexandre Lacazette, framherja liðsins, sem leikmanns sem væru hægt að selja fyrir dágóða upphæð.

Tottenham hefur einnig verið nefnt til sögunnar sem hugsanlegur áfangastaður Martinez. Það veltur þó líklega á því hvort Harry Kane fari frá Lundúnaliðinu.

Það hefur líklega ekki farið framhjá mörgum að Kane hefur verið orðaður sterklega í burtu frá Tottenham. Manchester City lagði fram 100 milljóna punda tilboð í hann fyrr í sumar. Því var hafnað.