Kórdrengir unnu góðan heimasigur á Vestra í Lengjudeild karla í dag. Leikurinn var liður í 11. umferð.
Gestirnir byrjuðu leikinn vel en tókst ekki að komast yfir. Kórdrengir fengu svo víti eftir tæpan hálftíma leik. Það var enginn annar en Loic Mbang Ondo sem fór á punktinn og skoraði. Staðan í hálfleik var 1-0.
Daníel Gylfason innsiglaði mikilvægan sigur Kórdrengja með marki á 77. mínútu. Lokatölur 2-0.
Kórdrengir eru nú með 19 stig í þriðja sæti deildarinnar. Liðið er 3 stigum á eftir ÍBV, sem er í öðru sæti. Efstu tvö liðin fara auðvitað upp um deild.
Vestri siglir nokkuð lignan sjó um miðja deild. Liðið er með 16 stig í sjötta sæti.
