B-riðli EM 2020 lauk nú rétt í þessu með tveimur leikjum. Belgía og Danmörk fara áfram í 16-liða úrslit.

Danmörk áfram eftir frábæra frammistöðu

Danir tóku á móti Rússum á Parken og unnu að lokum öruggan sigur.

Mikkel Damsgaard kom þeim yfir með frábæru marki á 38. mínútu. Það var eina mark fyrri hálfleiks.

Yussuf Poulsen tvöfaldaði forystu þeirra eftir slæm mistök í vörn Rússa.

Artem Dzyuba minnkaði muninn fyrir Rússland með marki úr vítaspyrnu þegar 20 mínútur lifðu leiks.

Heimamenn afgreiddu leikinn þó með tveimur mörkum með stuttu millibili. Fyrst skoraði Andreas Christensen á 79. mínútu og svo Joakim Mæhle á 82. mínútu. Lokatölur 4-1.

Belgía vann Finnland

Belgía og Finnland mættust í Sanktí Pétursborg. Belgía vann leikinn.

Belgarnir voru lengi að brjóta Finna á bak aftur. Markið kom þó á 74. mínútu þegar Lukas Hradecky setti boltann í eigið net.

Romelu Lukaku bætti svo við öðru marki á 81. mínútu. Lokatölur 2-0.

Belgía klárar riðilinn með fullt hús stiga. Danmörk fylgir þeim í 16-liða úrslit með 3 stig. Þeir hafa betri markatölu í innbyrðisviðureignum við Finnland og Rússland sem eru einnig með 3 stig.