Róbert Orri Þorkelsson varnarmaður Breiðabliks er að ganga í raðir Montreal Impact í MLS deildinni. Liðið er í Kanada og er Róbert keyptur til félagsins frá Breiðabliki. Mun hann ganga í raðir félagsins þegar félagaskiptaglugginn opnar.

Róbert Orri er fæddur árið 2002 en Breiðablik keypti hann frá Aftureldingu um haustið 2019. Hafði Róbert þá aðeins 17 ára gamall slegið í gegn í Lengjudeild karla.

Snemma sumars 2019 var vitað að flest öll félög í efstu deild höfðu áhuga á að kaupa Róbert, mörg félög voru líka spennt yfir þeirri staðreynd að drengurinn ungi var að verða samningslaus.

Róbert ákvað hins vegar að framlengja samning sinn við Aftureldingu í júlí árið 2019 til þess að tryggja að uppeldisfélagið myndi fá fjármuni í sinn vasa.  Breiðablik stökk til og keypti hann á ágætis upphæð.

Frá þeim tíma hefur Róbert spilað 16 leiki í efstu deild fyrir Breiðablik en frammistaða hans með U21 árs landsliði Íslands vakti áhuga margra félaga. Forráðamenn Montreal eru nú að ganga frá kaupum á Róberti, eigandi Montreal á einnig Bologna á Ítalíu.

Samkvæmt heimildum 433.is fær Afturelding 20 prósent af þeirri upphæð sem rennur í vasa Breiðabliks en kaupverð Montreal er sagt vera á 30-40 milljónir. Salan mun því skila hið minnsta 6 milljónum í vasa Aftureldingar og í annað skiptið á tveimur árum skilar Róbert aurum í kassann í heimabæ sínum.