Það voru læti á Akureyri á föstudag þegar Afturelding heimsótti Þór í Lengjudeild karla. Seint í leiknum átti Afturelding að fá vítaspyrnu þegar Jóhann Helgi Hannesson leikmaður Þórs varði boltann með hendi á marklínunni. Dómari leiksins, Sveinn Arnarson dæmdi ekkert.

Staðan var 2-1 fyrir Þórsara þegar atvikið kom upp og voru leikmenn Aftureldingar æfir yfir því að Sveinn skildi ekki dæma, Ísak Atli Kristjánsson leikmaður Aftureldingar blótaði Sveini í sand og ösku og uppskar að lokum rautt spjald.

„Þetta er svakalega dýrkeypt, Afturelding hefði fengið vítamínsprautu þarna og getað klárað þetta. Það er lélegt hjá dómara leiksins að sjá þetta ekki, þú getur lesið í hvernig þeir bregðast við og hversu flóttalegur Jóhann Helgi. Hann hefði getað stoppað þetta og rætt við línuvörðinn,“ sagði Hrafnkell Freyr Ágústsson, sérfræðingur Lengjudeildarinnar í markaþætti okkar í dag.

Hefði Svein blásið í flautu sína og dæmt víti hefði hann einnig rekið Jóhann Helga af velli.

Hörður Snævar Jónsson stjórnandi þáttarins sagði Svein vera í erfiðri stöðu. „Sveinn Arnarson dómari leiksins, hann býr á Akureyri en er ekki þaðan. Er þetta ekki óheppileg staða fyrir hann að vera í, hann umgengst fullt af Þórsurum. Akureyri er þannig séð lítið samfélag, á KSÍ ekki að senda mann að dæma sem hefur enga tengingu í samfélagið?,“ sagði Hörður.

Hrafnkell tók undir það. „Algjörlega, ég hef spilað marga leiki fyrir norðan í neðri deildunum. Maður sér það oft að dómarinn þekkir leikmennina í hinu liðinu, ég vil sjá KSÍ senda dómara úr bænum þangað. Það er miklu betra fyrir alla.“

Atvikið má sjá í upphafi markaþáttarins hér að neðan.