Barnabarn, Bill Shankly eins merkasta manns í sögu Liverpool krefst þess að stytta af afa sínum fyrir utan heimavöll Liverpool verði fjarlægð. Ástæðan er þáttaka Liverpool í að stofna Ofurdeildina sem nú gerir allt vitlaust í heimi fótboltans.

12 evrópsk stórlið á knattspyrnusviðinu tilkynntu seint á sunnudagskvöld að þau hafi tekið saman höndum um stofnun Ofurdeildar, The Super League. UEFA er alfarið á móti þessu og hótaði í gær að útiloka liðin og leikmenn þeirra frá þátttöku í öllum mótum á alþjóðasviðinu. Þá hafa knattspyrnusamböndin í Englandi, Spáni og á Ítalíu hótað að reka liðin úr deildarkeppnunum þar í landi. Markmiðið með deildinni er að til verði keppni þar sem 15 lið eiga alltaf fast sæti en árlega fái 5 önnur lið aðgang að keppninni.

„Ég veit að ummæli afa míns hafa mikið verið notuð og meira en áður, það er eðlilegt. Það sem hefur gengið á er fjarri öllum þeim gildum sem hann vildi hafa í félaginu,“ segir Carline Shankly við Liverpool Echo.

Shankly var stjóri Liverpool frá 1954 til 1974 en stór stytta af honum er fyrir utan Anfield.

„Ég skammast mín, þegar þú ræðir sögu Liverpool og rætur félagsins þá er hægt að nota mörg ummæli frá gamla karlinum. Ein ummæli hans um að koma félaginu nær stuðningsmönnum og stuðningsmönnum nær félaginu eiga vel við, honum tókst það.“

„Það er ekki orðum ofaukið að tala um að hann snúi sér í gröfinni í þessum aðstæðum, þetta er svo langt frá gildum hans. Ég myndi glaður vilja sjá styttuna af honum færða.“

„Það sem særir að þarna er saga og hefðir Liverpool sem hann tók þátt í að skapa, um að gera hlutina á réttan hátt. Að sjá svo félagið í þessum hóp er óásættanlegt.“