Guðni Bergsson formaður KSÍ blæs á kjaftasögur um að ósætti sé á milli Gylfa Þórs Sigurðssonar og Eiðs Smára Guðjohnsen aðstoðarþjálfara landsliðsins. Þetta geri Guðni í skriflegu svari til Vísir.is í kvöld.

Ástæðan fyrir því að Guðni svarar fyrir málið eru orð Guðjóns Þórðarsonar í kvöld á Vísir. Gylfi Þór er ekki í íslenska landsliðshópnum sem tapaði fyrir Armeníu í kvöld.

„Það sem ég er búinn að heyra í nokkra daga er að það sé ágreiningur eða núningur, þú getur kallað það hvað sem, á milli Gylfa og hugsanlegrar stöðunnar hjá Eiði Smára,“ sagði Guðjón í hlaðvarpsþættinum, The Mike Show í kvöld.

„Það er ekki góðs viti ef það er einhver núningur þar innan vébanda eða innan liðsins. Ég veit ekkert hvernig það er en þetta er það sem maður heyrir. Forystan þarf þá að koma fram og segja að það sé bara alls ekki.“

Í frétt á Vísir er vitnað í heimildarmenn. „Heimildarmenn, bæði úr herbúðum KSÍ og aðilum tengdum Gylfa Þór sjálfum, fullyrtu við Vísi í kvöld að fullyrðingar Guðjóns ættu ekki við rök að styðjast og að eina ástæðan fyrir fjarveru Gylfa væri ákvörðun hans og eiginkonu hans, Alexöndru Helgu Ívarsdóttur, um að hann yrði heima við vegna meðgöngu hennar í núverandi landsleikjatörn,“ segir í frétt á Vísir.

Guðjón hafði einnig þetta að segja í kvöld. „Það heyrist að Gylfi sé ósáttur við þá sem stöðu sem uppi er og upp hefur komið. Ég þekki það ekki en þetta er það sem maður heyrir. Ef að það eru einhver vandamál þá þarf að leysa þau og standa saman og stíga saman í sömu átt.“

Guðjón gaf ekki upp mögulega ástæðu fyrir því að ósætti gæti verið á milli aðilanna vegna stöðu Eiðs.