Karl Friðleifur Gunnarsson hefur gengið frá endanlegum félagsskiptum til Víkings Reykjavíkur frá Breiðablik. Karl Friðleifur var á láni hjá Víkingum á síðasta tímabili, varð Íslands- og bikarmeistari með liðinu og hann segir það aldrei hafa verið um annað að ræða í hans huga en að skipta yfir til Víkinga eftir tímabilið.

,,Það var aldrei spurning, það var bara eitt í huganum eftir tímabilið og það var að færa sig yfir til Víkings.

Víkingar boðuðu til blaðamannafundar þar sem tilkynnt var um komu tveggja hægri bakvarða, Karl Friðleifs og Davíðs Arnar. Karl segir samkeppnina af hinu góða.

,,Já það er fínt að hafa samkeppni og við getum báðir leyst aðrar stöður. Þetta er bara flott og við erum að styrkja hópinn,“ sagði Karl Friðleifur í samtali við 433.is í dag.

Karl Friðleifur sló í gegn með Víkingum á síðasta tímabili og talað var um að hann gæti tekið skrefið og farið út í atvinnumennsku. Er hann búinn að loka dyrnar á það í bili?

,,Ég er ekkert búinn að komast í það að skoða þetta. Þetta verður bara að koma í ljós. Það opnast gluggi í janúar og ef það kemur einhvað spennandi upp á borðið þá verð ég bara að skoða það,“ sagði Karl Friðleifur Gunnarsson, leikmaður Víkings Reykjavíkur við 433.is í dag.