Aron Jóhannsson mun skrifa undir samning við Val í vikunni ef ekkert óvænt kemur uppá. Þetta kom fram í Dr. Football hlaðvarpinu í morgun.

Greint var frá því í síðustu viku að Aron hefði valið að ganga í raðir Vals. Víkingur, Breiðablik og FH höfðu rætt við hann.

Aron mun samkvæmt Dr. Football hlaðvarpinu skrifa undir samning sinn við Val í vikunni en hann mun ljúka læknisskoðun hjá félaginu í dag.

Aron sem er 31 árs gamall rifti samningi sínum við Lech Poznan í Póllandi á dögunum. Ástæðan var sú að Aron meiddist á öxl og tæpt var að hann myndi spila fleiri leiki fyrir pólska félagið.

Hann hefur átt frábæran feril í atvinnumennsku síðustu ellefu ár. Hann hefur spilað með AGF í Danmörku, AZ Alkmaar í Hollandi, Werder Bremen í Þýskalandi, Hammarby í Svíþjóð og nú síðast Poznan í Póllandi.

Aron hafði æft með Vali fyrir tæpu ári síðan. Tímabil Vals í sumar voru vonbrigði og er ljóst að Aron ætti að styrkja liðið verulega.

Hann á að baki nokkurn fjölda leikja fyrir landslið Bandaríkjanna en frægt var þegar hann kaus að velja að spila fyrir Bandaríkin fremur en Ísland.