Chelsea hefur staðfest þær fréttir um að félagið sé búið að reka Frank Lampard úr starfi knattspyrnustjóra. Ekki er búist við öðru en að Chelsea muni ráða Thomas Tuchel til starfa á allra næstu dögum.
Gengi Chelsea síðustu vikur hefur verið slakt og hefur Roman Abramovich, eigandi Chelsea tekið ákvörðun um að reka Lampard úr starfi.
„Þetta var mjög erfið ákvörðun fyrir félagið, sérstaklega vegna þess að ég á frábært persónulegt samband við Lampard, ég ber endalausa virðingu fyrir honum,“ sagði Abramovich um brottrekstur Lampard.
Chelsea situr í níunda sæti ensku úrvalsdeildarinnar, ellefu stigum á eftir toppliði Manchester United.
„Hann er heiðarlegur maður sem leggur mikið á sig í vinnunni, í þessum kringumstæðum fannst okkur það besta ákvörðunin að skipta um þjálfara.“
Roman Abramovich lét Lampard fá 200 milljónir punda í leikmannakaup í sumar en árangurinn fylgir ekki með, eigandi Chelsea er ekki þekktur fyrir mikla þolinmæði gagnvart stjórum sínum.
„Fyrir hönd allra hjá félaginu, þá vil ég þakka Frank fyrir hans vinnu. Ég óska honum góðs gengis í framtíðinni, hann er goðsögn hjá félaginu og staða hans þar hefur ekkert breyst. Hann verður alltaf velkominn á Stamford Bridge.“
