Það eru taldar meiri líkur á því að Chelsea reki Frank Lampard úr starfi frekar en að Newcastle láti Steve Bruce fara.

Chelsea hefur gengið illa undanfarnar vikur og er staða Lampard sögð í hættu, þessi goðsögn hjá Chelsea er á sínu öðru ári í starfi.

Roman Abramovich lét Lampard fá 200 milljónir punda í leikmannakaup í sumar en árangurinn fylgir ekki með, eigandi Chelsea er ekki þekktur fyrir mikla þolinmæði gagnvart stjórum sínum.

Chelsea tapaði fyrir Leicester í vikunni og eftir góða byrjun er liðið nú komið í áttunda sæti deildarinnar. Ensk blöð segja að Lampard fái þrjá deildarleiki til að koma Chelsea aftur í gang.

Um er að ræða leik gegn Wolves sem hafa lítið getað og leik gegn Burnley sem berst fyrir lífi sínu, loks er það svo leikur gegn Tottenham í byrjun febrúar.

Ensk blöð segja að Abramovich sé byrjaður að efast um það að Lampard hafi það sem til þarf og sé að skoða breytingar.