Leikmönnum í ensku úrvalsdeildinni hefur verið ráðlagt af forráðamönnum deildarinnar að faðmast ekki og ekki gefa fimmu þegar mörkum er fagnað í deildinni. Er þetta gert til þess að minnka líkurnar á útbreiðslu Covid-19 smits í deildinni.

Breski vefmiðilinn The Athletic, fer yfir það á vefsíðu sinni í dag hvernig leikmenn geta fagnað mörkum án þess að fallast í faðma. Eitt af dæmunum sem er dregið fram í umfjöllun vefmiðilsins eru fögn Stjörnumanna á sinum tíma.

Fögn leikmanna Stjörnunnar vöktu mikla athygli í knattspyrnuheiminum á sínum tíma.

„Kynnið ykkur einfaldlega vinnu leikmanna Stjörnunnar á Íslandi sem virtust eyða öllum sínum frítíma í að skipuleggja fögn fyrir nokkrum árum. Forðist kannski fagnið þar sem einn leikmaðurinn virðist láta eins og hann hafi fengið hjartaáfall á vellinum,“ segir í umfjöllun The Athletic.

Víst er að sum fögn Stjörnunnar geti fallið undir reglur ensku úrvalsdeildarinnar um það hvernig leikmenn megi fagna mörkum, en ekki öll. Engu að síður er gaman að rifja upp þessi fögn Stjörnumanna sem lífguðu talsvert upp á knattspyrnusumarið á sínum tíma.

Nú er það spurning hvort leikmenn ensku úrvalsdeildarinnar taki sig saman í frítímanum og skipuleggji skemmtileg fögn án snertingar.