Manchester City reyndi að kaupa vonarstjörnu Barcelona, Ansu Fati, undir lok félagsskiptagluggans í sumar þegar ljóst var að Cristiano Ronaldo myndi ekki semja við félagið.
Á tímabili leit út fyrir að Cristiano Ronaldo væri á leið til Manchester City en það snerist við og hann gekk til liðs við Manchester United. Nú segir í frétt Mundo Deportivo að þá hafi Guardiola ákveðið að reyna við Ansu Fati en það gekk ekki upp þar sem leikmaðurinn hafði ekki áhuga á að færa sig um set.
Barcelona hefur átt í miklum fjárhagsvandræðum og gat til að mynda ekki haldið stórstjörnunni Lionel Messi áfram hjá félaginu. Það eru því góðar fréttir fyrir stuðningsmennn Barcelona að félagið hafi ekki misst Ansu Fati í sumar en hann er vonarstjarna liðsins.
Fati og umboðsmaður hans, Mendes, voru báðir sammála um að hann fengi fleiri tækifæri hjá Barcelona en Manchester City í vetur og það væri rétt að vera áfram þar og byggja upp ferilinn.
