Dóra María Lárusdóttir átti frábært sumar með Val sem varð Íslandsmeistari í knattspyrnu kvenna. Dóra er 36 ára gömul en átti eitt sitt besta tímabil á ferlinum. Fjallað er um málið í Fréttablaðinu í dag.

Dóra stjórnaði leik Vals og átti stóran þátt í því að sá stóri fór aftur á Hlíðarenda. Dóra María lék sinn fyrsta leik með Val árið 2001 og hefur síðan þá orðið Íslandsmeistari átta sinnum.

Í liði Vals í dag eru meðal annars Ída Marín Hermannsdóttir, sem var ekki fædd þegar Dóra spilaði fyrsta leikinn sinn í meistaraflokki. Varamarkvörðurinn Fanney Inga Birkisdóttir er fædd 2005 en þá var Dóra búin að vera í tvö ár í landsliðinu. Svo er Arna Eiríksdóttir, sem kom í heiminn 2002

„Ég upplifi mig oft sem mikið aðhlátursefni í klefanum. Þær stelpurnar hlæja að mér eins og ég að mömmu minni fyrir orðanotkun og annað. Ég er alltaf að reyna að vera hipp og kúl en með misjöfnum árangri,“ segir Dóra María við Fréttablaðið.

Dóra bendir á í viðtalinu við Fréttablaðið að hún sé eldri en pabbi einnar stelpu í liðinu og sé hætt að reyna að skipta sér af tónlistinni í klefanum.

„Það er fullt af spennandi hlutum í gangi. Valur er með geggjað lið núna og að komast í riðlakeppni meistaradeildarinnar er raunhæfur möguleiki,“ sagði Dóra María sem virðist ekki á þeim buxunum að hætta strax.

„Mér fannst tímabilið í fyrra svolítið leiðinlegt með öllum þessum Covid-stoppum en ég sagði nú einhvern tímann að það væri erfitt að finna tímapunkt til að hætta, hvað þá þegar vel gengur. Sjáum til,“ segir Dóra María.