Ísland tók á móti Þýskalandi í undankeppni HM á Laugardalsvelli í kvöld. Þjóðverjar voru miklu sterkari í leiknum og unnu öruggan 4-0 sigur. Jóhann Berg Guðmundsson hafði þetta að segja í viðtali við Rúv eftir leikinn:

„Þeir eru bara gríðarlega góðir og við bara ekki nógu góðir eins og staðan er í dag. Við þurfum auðvitað bara að læra af því og gera færri mistök. Það má ekki gera nein mistök á móti svona liðum. Við þurfum að gera betur en þeir eru auðvitað með frábært lið eins og þeir sýndu í dag,“ sagði Jói Berg við Rúv.

Ísland fékk aðeins 1 stig úr þessum landsleikjaglugga en liðið tapaði gegn Rúmeníu og gerði jafntefli gegn Norður-Makedóníu. Jói Berg var ósáttur við að hafa ekki unnið þá leiki:

„Ef við ætlum að gera eitthvað í þessum riðli þá verðum við að vinna svona leiki og við gerðum það ekki og það er auðvitað ekki nógu gott.“

Mikil endurnýjun er í gangi í landsliðinu núna og margir ungir leikmenn að fá tækifæri. Jói Berg var nokkuð ánægður með ungu leikmennina í glugganum.

„Þetta eru frábærir fótboltamenn en þeir eru auðvitað ungir og eru að læra. Við erum ekki að fara að spila fótbolta eins og Þýskaland og þessar þjóðir. Ég hef sagt það áður að við þurfum að vera mjög vel rútineraðir og við erum enn að ná því,“ sagði Jói Berg að lokum við Rúv.