Ísland tók á móti Þýskalandi í undankeppni HM á Laugardalsvelli í kvöld. Þjóðverjar voru miklu sterkari í leiknum og unnu öruggan 4-0 sigur. Þetta hafði Birkir Már Sævarsson að segja í viðtali við Rúv að leik loknum:
„Þetta er frábært lið. Þeira eru bara betri og sýndu það í dag. Við áttum ágætis spretti inn á milli en það er bara erfitt að eiga við þá í þessum ham,“ sagði Birkir Már við Rúv.
Birkir var spurður út í landsleikjagluggan í heild og hvernig honum líst á kynslóðaskiptin sem eru hafin í landsliðinu.
„Við hefðum viljað ná fleiri stigum út úr þessu en ef ég lít til baka þá sér maður að það er eitthvað í gangi og þó að úrslitin séu ekki að detta þá eru þessir strákar að fá dýrmæta leiki á móti góðum mótherjum og við gömlu hundarnir reynum að leiðbeina eins og við getum. Ég held að úrslitin fari að detta hvað og hverju.“
„Ég vona að úrslitin fari að detta í október. Liðið er búið að spila aðeins saman og þetta er að slípast til. Ég hef trú á að úrslitin fari að detta og við reynum við Evrópumótið,“ sagði Birkir Már að lokum við Rúv.
