Ísland tók á móti Þýskalandi í undankeppni HM á Laugardalsvelli í kvöld. Þjóðverjar voru miklu sterkari í leiknum og unnu öruggan 4-0 sigur. Þetta hafði Albert Guðmundsson að segja í viðtali við Rúv að leik loknum:
„Þetta er auðvitað smá súrt. Það er alltaf leiðinlegt að tapa, sérstaklega á heimavelli. Auðvitað eru þeir góðir en þetta er svolítið mikill skellur finnst mér,“ sagði Albert í viðtali við Rúv.
Þessi landsleikjagluggi fór ekki vel en Íslendingar náðu aðeins í eitt stig í þremur leikjum. Hvað klikkaði í þessum glugga að mati Alberts?
„Stigin þurfa að vera fleiri. Það vantar aðeins meiri grimmd varnarlega og sóknarlega og það kostaði okkur stigin í hinum leikjunum. Ég hefði viljað byrja af krafti frá fyrstu mínútu í fyrstu leik.“
„Það er ákveðin endurnýjun í gangi en auðvitað þurfum við líka reynslu frá eldri leikmönnum til að hjálpa okkur. Eiður og Arnar eru að koma með sínar hugmyndir inn og við þurfum að meðtaka þær eins fljótt og við getum svo við getum farið að ná í úrslit.“
Aðspurður um eigin frammistöðu í þessum landsleikjaglugga var hann ekki ánægður og hefði viljað gera betur.
„Ekki nógu góð, mér finnst ég geta gert betur,“ sagði Albert að lokum í viðtali við Rúv.
