Ísak Andri Sigurgeirsson hefur heillað með ÍBV í Lengjudeildinni seinni hluta sumars. Hann er þar á láni frá Stjörnunni. Leikmaðurinn var til umræðu í Markaþætti Lengjudeildarinnar á Hringbraut í gær.

Hrafnkell Freyr Ágústsson, sérfræðingur þáttarins, telur Stjörnuna geta notað Ísak í Pepsi Max-deildinni strax á næstu leiktíð. Leikmaðurinn er fæddur árið 2003 og því mikið efni.

,,Þetta er strákur sem við sjáum ekkert rosalega oft á Íslandi. Hann tekur boltann og keyrir á menn, er algjörlega óhræddur. Mér finnst hann svolítið líkur Stefáni Árna Geirssyni sem spilar með KR. Hann brýtur upp leikinn og getur komið með þetta óvænta. Ég held að Stjörnumenn muni nota hann strax á næsta tímabili,“ sagði Hrafnkell.

Ísak var í byrjunarliði ÍBV sem tapaði fyrir Fjölni í kvöld. Hann hefur alls spilað sjö leiki fyrir Eyjamenn á leiktíðinni og skorað í þeim eitt mark.

Hér fyrir neðan má horfa á Markaþátt Lengjudeildarinnar.