Arnar Þór Viðarsson landsliðsþjálfari Íslands sat fyrir svörum á fréttamannafundi í Laugardalnum í dag. Á morgun mætir liðið Þýskalandi í undankeppni HM.

Liðið er á leið í sinn þriðja leik á viku en liðið er með marga nýja leikmenn í sínum röðum.

Aron Einar Gunnarsson fyrirliði íslenska liðsins er ekki með í verkefninu, hefur Arnar Þór sagt frá því að Aron hafi glímt við COVID-19 sjúkdóminn. Aron sat fastur í einangrun á Spáni um það leyti sem landsliðshópurinn kom saman. Al-Arabi var þar í æfingaferð.

Aron hefur hins vegar náð bata og lék með Al-Arabi í Katar á sunnudag, á sama tíma og íslenska landsliðið lék gegn Norður-Makedóníu í undankeppni HM.

„Þetta er bara eins og við töluðum um þá, Aron var með COVID og hafði verið slappur,“ sagði Arnar Þór en Aron byrjaði á bekknum í leiknum hjá Al-Arabi en lék síðustu mínútur leiksins.

„Á þeim tímapunkti sem hópurinn var valinn þá var hann ekki leikfær í fyrsta leikinn og við vissum hreinlega ekki hversu hratt það myndi ganga fyrir sig að hann næði bata.“

Ísland er með fjögur stig eftir fimm leiki í undankeppni HM en ljóst er að leikurinn gegn Þýskalandi verður afar erfiður.