Viðar Örn Kjartansson var heilt yfir fremur sáttur með spilamennsku íslenska landsliðsins í kvöld þrátt fyrir 0-2 tap gegn Rúmenum. Leikurinn var liður í undankeppni HM. Spilað var á Laugardalsvelli.

Íslendingar voru betri aðilinn í fyrri hálfleik en tókst ekki að nýta færin sín. Snemma í seinni hálfleik kom Dennis Man Rúmenm hins vegar yfir og sló það íslenska liðið aðeins út af laginu.

Nicolae Stanciu gerði svo út um leikinn með marki eftir skyndisókn á 83. mínútu.

Viðar var kallaður inn í landsliðshópinn skömmu fyrir leik þar sem Kolbeinn Sigþórsson þurfti frá að víkja. Viðar var þó mættur í byrjunarlið Íslands í kvöld.

,,Það er alltaf skrýtið þeagr maður er kallaður inn með stuttum fyrirvara. Ég var ekkert viss um að ég myndi starta, tiltölulega nýkominn til baka eftir meiðsli,“ sagði hann eftir leik við RÚV.

Viðar viðurkenndi að mark Rúmena í upphafi seinni hálfleiks hafi slegið íslenska liðið út af laginu.

,,Já, mér leið fáránlega vel áður en þeir skora þetta mark. Við vorum mjög líklegir, ég fékk mjög gott færi í fyrri, Birkir líka. Vorum að spila flottan fótbolta í fyrri hálfleik. Mér fannst tímaspursmál hvenær við myndum skora en ekki þeir. Þeir setja hann þarna upp úr engu og það slær okkur út.“

,,Þegar maður tapar er maður aldrei sáttur en mér fannst frammistaðan á vellinum (góð), mér fannst við betri stóran part af leiknum.“

Eins og flestum er kunnugt hefur karlalandsliðið og Knattspyrnusamband Íslands verið í brennidepli undanfarið vegna meintra kynferðisafbrotamála landsliðsmanna og þöggunar innan sambandsins í tengslum við þau. Viðar var spurður út í andrúmsloftið á Laugardalsvelli eftir erfiða viku.

,,Það var frekar þögult. Þetta er búið að vera erfið vika fyrir okkur alla. En við stóðum bara saman strákarnir. Eins og ég segi, með marki í fyrri hálfleik hefðum við unnið þennan leik. Við verðum bara að koma betur gíraðir í næsta leik.“